寫Blog 之得人驚回憶錄

以前，好鐘意睇blog，又好鐘意寫blog。慢慢，兩樣野都無做。

初初發現blog 呢片新大陸既時候，覺得好正。嘩，咁多高手卧虎藏龍係網上免費寫野比你睇，幫你提升思維增長智慧喎，仲要Ｄ水準比愛國愛澳既新園地專欄作家高幾十皮，咁我仲使乜比幾蚊雞去買份澳門日報黎睇先。

初初發現一個正blog，然後十個，然後一百個，然後..... Blog 得多都要精力夠，精力夠都要時間夠，時間....　係永遠都唔會夠既。最後，我係芸芸精彩既Blog 海之中被淹沒，注意力轉而做第二樣野度（註：轉黎轉去，都係打機架啫，男仔仲有其他野做咩）。

寫Blog又如何呢？初頭覺得好正，竟然有一個咁美麗既場景去抒發自戀式的感性表達，真係所謂既「乖乖不得了」。於是，梗係日Blog 夜Blog，一日Blog 幾次，長Blog 長有tim 呀。

問：咁有趣既事，做得多都唔會悶架喎！！

答：無錯，係唔會悶既。不過，原來，過度既自戀同對鏡自憐，係會令人窒息架！！！

有時候，重看自己以前寫的矯情文字，都會有唔想食飯既感覺。嘩！咁都寫得出，仲瓊瑤過瓊瑤，仲誠俊哥過誠俊哥喎！好核突，好核突，睇完會出一身冷汗，再打多幾個冷震。

不過，原來自己既噁心程度都只係一般啫。睇返有部份少女（嗱，部份ja部份ja）寫既Xanga，真係，正到呀.... 正到我暈呀！文字稚嫩不在話下，情感表達矯揉造作也算了，最攞命既係，估唔到原來好多少女都會擺性感肉照係自己個「腥架」度，保證有溝睇，保證有Bra底露！

你話，我一介麻甩仔，點撼先！以卵擊石，螳臂擋車啫！唔怪之得，無論點寫，都一定紅唔起，popular 唔到啦，原始的殺傷力，是好很大，殺很大的！

後來，生活上又有太多累人既事，分身無暇，就丟底左唔寫Blog lu。

Blog 問：有野做就唔寫，無聊無野做o個時又返返黎，你當我係咩先？

Blog.... 從來都係，有需要既時候先會Blog 的，現在有需要，就來Blog 幾下了。


每天寫下流水帳式的日記好了。可能最後，篇篇都重覆以下幾句：

我隨便看了他一眼 　我順便嫁了
我們隨便亂來 　總沒有生下孩子

我隨便煮些湯水 　我們順便活著
幾個隨便的朋友 　時光順便就溜走

我們也順便老去 　接下來病入膏肓
順便成為榜樣 　"好一對恩愛夫妻"

......祥和的生活 　我們簡單地斷了氣
太陽順便照了一眼 　空無一人的陽台

我最近好鐘意既一首新詩。First seen at http://mypaper.pchome.com.tw/chinpang/post/1312850789。
作者為尹麗川，題目叫《生活本該如此嚴肅》。